42 Tirana mirëpriti grupin e parë me 160 studentë në fazën Common Core!

42 Tirana mirëpriti 160 studentët e parë që hynë në fazën Common Core, periudhën themelore të kurrikulës 42, e ndërtuar mbi bashkëpunimin, mësimin autodidakt dhe zgjidhje krijuese të problemeve.

Gjatë kësaj faze, studentët punojnë në projekte që zhvillojnë aftësi teknike në gjuhën C, bazat e zhvillimit të softuerit dhe aftësi bashkëpunuese e analitike, duke u përgatitur për sfidat e profesionit të ardhshëm.

Eventi i nisjes, i mbajtur në Piramidën e Tiranës, mblodhi bashkë studentë, partnerë dhe mbështetës të programit për të festuar këtë hap të ri për edukimin teknologjik në Shqipëri.

Me mbështetjen e AADF, 42 Tirana vazhdon të forcojë ekosistemin dixhital shqiptar dhe të frymëzojë gjeneratën e re të inovatorëve në teknologji përmes një modeli arsimor modern, pa tarifa dhe të hapur për të gjithë.

42 Tirana është pjesë zyrtare e rrjetit global të shkollave “École 42”, themeluar në Paris në vitin 2013 nga sipërmarrësi francez Xavier Niel.

Ky rrjet inovativ përfshin mbi 50 kampuse në mbarë botën, nga Parisi, Lisbona e Roma, deri në Tokio, Dubai e San Francisko, dhe ofron një model unik arsimor, pa mësues, pa tarifa dhe të bazuar në mësimin përmes projekteve praktike.

Në Shqipëri, 42 Tirana u inaugurua në maj 2025 nga AADF, me misionin për të zhvilluar talentet e reja në teknologji dhe për të ndërtuar gjeneratën e ardhshme të profesionistëve dixhitalë.

Kjo nismë përfaqëson një hap të rëndësishëm për zhvillimin e ekosistemit dixhital të vendit dhe krijimin e mundësive të barabarta për të rinjtë që duan të ndërtojnë karrierën e tyre në fushën e teknologjisë.