Kërcimi i Tropojës Bëhet Pjesë e Listës së Trashëgimisë Jomateriale të Njerëzimit të UNESCO-s

Kërcimi i Tropojës, një traditë e përjetshme dhe simbolike nga veriu i Shqipërisë, është përfshirë zyrtarisht në Listën Përfaqesuese të Trashegimisë Jomateriale të Njerëzimit të UNESCO-s. Kjo valle e lashtë, e njohur për koreografinë unike, lëvizjet ekspresive dhe ritmin energjik, pasqyron shpirtin dhe historinë e pasur të zonës së Tropojës.

AADF ka luajtur një rol kyç në këtë arritje të jashtëzakonshme. Në bashkëpunim me Ministrinë e Ekonomisë, Kulturës dhe Inovacionit, AADF konceptoi dhe mbështeti përgatitjen e dosjes për njohjen nga UNESCO. Ky propozim u vlerësua pozitivisht dhe u miratua zyrtarisht gjatë sesionit të 19-të të Komitetit Ndërqeveritar për Mbrojtjen e Trashëgimisë Kulturore Jomateriale të UNESCO, i mbajtur në Asunción, Paraguai.

I njohur gjithashtu si “K’cimi” Kërcimi i Tropojës është një thesar kulturor që ka ruajtur gjallërinë dhe rëndësinë e tij ndër breza. Ai përfshin elemente të artit performues, ritualeve dhe traditave festive, duke shërbyer si simbol identiteti dhe uniteti për banorët e Tropojës dhe Malësisë së Gjakovës.

Ky kërcim ekspresiv realizohet gjatë ngjarjeve të rëndësishme shoqërore dhe ceremoniale si dasmat, fejesat dhe festivalet lokale. I shoqëruar nga instrumente tradicionale si daullja, fyelli dhe çiftelia dhe i pasuruar me shamitë e kuqe dhe të verdha, performancat janë një shfaqje e energjisë, gëzimit dhe autenticitetit kulturor.

Njohja e Kërcimit të Tropojës si pasuri boterore jomateriale ndjek e regjistrimin e sukseshëm të Xhubletës dhe Transhumancës në Listën Përfaqesuese të Trashegimisë Jomateriale të Njerëzimit të UNESCO-s. Kjo njohje është një tjetër arritje e rëndësishme e përpjekjeve të AADF për të promovuar trashëgiminë kulturore shqiptare në botë. Iniciativa jo vetëm që ruan traditën për brezat e ardhshëm, por gjithashtu nxjerr në pah pasurinë kulturore të Shqipërisë në skenën ndërkombëtare.