Thirrja për Aplikim: Grante për Komunitetin Butrint

Thirrja e parë për Grante për Komunitetin Butrint

Një mundësi për zhvillimin e ideve dhe iniciativave lokale.

Fondi Shqiptaro-Amerikan për Zhvillim (AADF) dhe Butrint Management Foundation (BMF) hapin thirrjen e parë për aplikime në kuadër të Skemës së Granteve për Komunitetin Butrint.

Kjo skemë synon të mbështesë individë, biznese lokale dhe organizata jofitimprurëse që duan të zhvillojnë ide, investime dhe aktivitete të lidhura me Parkun Kombëtar të Butrintit dhe komunitetet përreth tij.

Periudha e aplikimit: 16 korrik – 15 tetor 2026
Afati i fundit: 15 tetor 2026, ora 16:00
Financimi: Grante deri në 20,000 USD

Komuniteti në qendër të së ardhmes së Butrintit

AADF, në bashkëpunim me Ministrinë e Kulturës, krijoi Butrint Management Foundation si fondacionin zbatues të një modeli të integruar menaxhimi për Butrintin.

Ky model synon ruajtjen dhe zhvillimin e trashëgimisë kulturore dhe natyrore të Parkut Kombëtar të Butrintit, duke vendosur në qendër edhe komunitetet që jetojnë dhe punojnë pranë tij.

Banorët, artizanët, fermerët, guidat turistike, operatorët e turizmit, bizneset dhe organizatat lokale luajnë një rol të rëndësishëm në zhvillimin e zonës. Përmes produkteve, shërbimeve, eksperiencave dhe aktiviteteve të tyre, ata kontribuojnë në një ekonomi lokale më aktive dhe në një destinacion më të qëndrueshëm.

Skema e Granteve për Komunitetin është krijuar për të mbështetur pikërisht këtë.

Çfarë synon Skema e Granteve?

Skema synon të mbështesë ide dhe iniciativa që kontribuojnë në zhvillimin:

• ekonomik
• kulturor
• social
• turistik

të komuniteteve që ndodhen pranë Parkut Kombëtar të Butrintit.

Mbështetja synon të ndihmojë aplikuesit të zhvillojnë aktivitetet e tyre, të përmirësojnë produktet dhe shërbimet ekzistuese ose të krijojnë iniciativa të reja që sjellin përfitime për zonën dhe komunitetin.

Kush mund të aplikojë?

Individë

Mund të aplikojnë individë që kanë një ide ose aktivitet konkret të lidhur me zonën dhe fushat që mbështet skema.

Individët mund ta dorëzojnë aplikimin pa qenë të regjistruar paraprakisht si biznes. Megjithatë, nëse shpallen fitues, do të duhet të regjistrohen të paktën si biznes i vogël pas njoftimit të përzgjedhjes.

Biznese lokale dhe subjekte të regjistruara

Mund të aplikojnë biznese dhe subjekte të regjistruara që ushtrojnë ose synojnë të zhvillojnë një aktivitet të lidhur me territorin, komunitetet dhe zhvillimin e zonës së Butrintit.

Organizata jofitimprurëse

Mund të aplikojnë OJF-të që zhvillojnë aktivitete në territorin e Parkut Kombëtar të Butrintit ose në mbështetje të komuniteteve të tij.

Çdo kategori duhet të shkarkojë dhe të plotësojë paketën përkatëse të aplikimit.

Zonat që përfshihen në thirrje

Thirrja u drejtohet aplikuesve me vendndodhje në territorin e:

Vrinës, Shëndëllisë, Xarrës dhe Mursisë, si edhe në zona të tjera rurale të kufizuara me Parkun Kombëtar të Butrintit, të identifikuara si prioritare për zhvillim ekonomik, social dhe turistik në Planin e Menaxhimit të Integruar.

Një hartë e këtyre zonave i bashkëlidhet kësaj thirrjeje.

Çfarë lloj idesh mbështeten?

Aktivitete që lidhen me artizanatin, bujqësinë, blegtorinë, produktet lokale, akomodimin, gastronominë tradicionale, guidat turistike, kulturën, shërbimet dhe nismat komunitare.

Çfarë përfshin financimi?

Nëpërmjet kësaj Skeme Grantesh mund të financohen blerjet e makinerive, pajisjeve, mobilimeve për qëllim biznesi, përmirësim ambientesh, sinjalistikë, gjelbërim, kryerjen e aktivitete kulturore, promocionale, trajnuese dhe përfaqësuese, si edhe mbështetje për qira ambjent biznesi në raste të caktuara.

Skema është bashkëfinancuese: aplikuesi kontribuon në projekt, ndërsa granti mbështet pjesën tjetër të tij.

Sa është financimi?

AADF mbështet aplikuesit me grante deri në 20,000 USD, sipas llojit të investimit, buxhetit dhe kategorisë së aplikimit.

Një aplikues mund të përfitojë vetëm një grant brenda thirrjeve të kësaj skeme.

Si aplikohet?

1. Shkarko paketën e aplikimit sipas kategorisë: Individ, Biznes ose OJF. 
2. Plotëso formularin e aplikimit. 
3. Përgatit preventivin ose buxhetin e projektit. 
4. Bashkëngjit dokumentet e kërkuara. 
5. Dorëzo dosjen e plotë pranë BMF brenda afatit.

V.O. Gjatë kohëzgjatjes së thirrjes, sesione të hapura informimi do të organizohen nga BMF, ku aplikuesit mund të marrin pjesë.

Procesi i thirrjes

16 korrik – 15 tetor 2026
Aplikimet janë të hapura dhe pranohen nga BMF.

15 tetor – 30 tetor 2026
BMF kryen verifikimin administrativ të dosjes së aplikimit. Sqarime kërkohen vetëm kur është e nevojshme.

30 tetor – 7 nëntor 2026
Komiteti i Vlerësimit shqyrton aplikimet, merr vendimet dhe komunikon rezultatet.

10 – 25 nëntor 2026
Lidhen marrëveshjet me fituesit e shpallur dhe fillon faza e disbursimit të fondeve sipas marrëveshjeve përkatëse.

Ke pyetje? BMF është pranë komunitetit

BMF ka një specialist të dedikuar për t’iu përgjigjur pyetjeve të aplikuesve dhe për të ofruar informacion edhe në terren. Pyetjet dërgohen në adresën e-mail ose në numrin WhatsApp të BMFsë, të dedikuar dhe të shpallur për Skemen e Granteve.

Përgatit idenë, shkarko paketën e duhur dhe dorëzo aplikimin brenda afatit.

Afati i fundit për aplikim:
15 tetor 2026, ora 16.00.