Një Memorandum Mirëkuptimi për të Fuqizuar Muzetë përmes Teknologjisë

AADF është angazhuar për të ndihmuar në ruajtjen e trashëgimisë kulturore të Shqipërisë. Nënshkrimi i Memorandumit të Mirëkuptimit me Ministrinë e Kulturës për projektin “Të fuqizojmë muzetë përmes teknologjisë” edhe njëherë vërteton zotimin e AADF-së për të vënë në jetë praktikat më të suksesshme ndërkombëtare për të ruajtur dhe promovuar trashëgimisë kulturore shqiptare.

AADF ka financuar 60,000 dollarë për fazën fillestare të projektit, i cili do të vihet në zbatim në Muzeun Kombëtar Ikonografik Onufri në Berat dhe në Muzeun Kombëtar të Artit Mesjetar Korçë. Kjo fazë parashikon gjithashtu edhe një bashkëpunim me “Cultural Heritage Imaging”, një organizatë jo-qeveritare nga Shtetet e Bashkuara e cila do të ofrojë trajnime dhe ekspertizë. Fazat pasardhëse kanë si synim përfundimtar t’i bëjnë më të prekshme për publikun koleksionet e jashtëzakonshme të muzeve kombëtar përmes teknologjive ndërvepruese.