Shkolla e Drejtorëve certifikon Brezin e Dytë të Programit të Trajnimit për Arsimin Parashkollor

Më 1 korrik 2026, Shkolla e Drejtorëve organizoi ceremoninë e certifikimit të Brezit të Dytë të Programit të Trajnimit të Detyrueshëm për drejtuesit e institucioneve të arsimit parashkollor, duke shënuar përfundimin me sukses të një tjetër cikli të rëndësishëm të zhvillimit profesional për këtë sektor.

Në ceremoni morën pjesë Ministrja e Arsimit, znj. Mirela Kumbaro, Kryetarja në detyrë e Bashkisë Tiranë, znj. Anuela Ristani, përfaqësues të Ministrisë së Arsimit, anëtarë të Bordit të Shkollës së Drejtorëve, trupa e trajnerëve dhe partnerë institucionalë.

Shkolla e Drejtorëve është një projekt i rëndësishëm në fushën e arsimit, i cili synon forcimin e lidershipit arsimor në Shqipëri përmes trajnimit, certifikimit dhe zhvillimit të vazhdueshëm profesional të drejtuesve dhe kandidatëve për drejtues të institucioneve arsimore. Si model kualifikimi profesional, ajo vendos në fokus aftësitë drejtuese, menaxhimin institucional, planifikimin strategjik, bashkëpunimin me komunitetin dhe përmirësimin e cilësisë së shërbimit arsimor.

Në një sistem arsimor ku cilësia e drejtimit ndikon drejtpërdrejt në funksionimin e institucioneve, në mbështetjen e mësuesve dhe në përvojën e fëmijëve e nxënësve, Shkolla e Drejtorëve ofron një qasje të strukturuar dhe praktike për zhvillimin e kapaciteteve drejtuese. Programet e saj nuk kufizohen vetëm në formim teorik, por lidhen ngushtë me realitetin e institucioneve arsimore, duke i orientuar pjesëmarrësit drejt zgjidhjeve konkrete dhe përmirësimit të praktikave të përditshme të menaxhimit.

Programi i Trajnimit të Detyrueshëm për Arsimin Parashkollor, i zhvilluar gjatë periudhës 17 tetor 2025 – 4 prill 2026, u përfundua me sukses nga 74 drejtues dhe kandidatë për drejtues të institucioneve parashkollore nga e gjithë Shqipëria. Gjatë këtij procesi, pjesëmarrësit realizuan 54 projekte praktike në institucionet ku ushtrojnë detyrën, duke adresuar nevoja konkrete dhe duke kontribuar në përmirësimin e organizimit institucional, bashkëpunimit me prindërit dhe komunitetin, si dhe cilësisë së procesit edukativ.

Këto projekte dëshmojnë rëndësinë e një modeli trajnimi që e lidh zhvillimin profesional me praktikën reale në terren. Përmes kësaj qasjeje, drejtuesit nuk janë vetëm përfitues të një programi kualifikimi, por aktorë aktivë të ndryshimit në institucionet e tyre, duke ndikuar në krijimin e mjediseve më cilësore, gjithëpërfshirëse dhe mbështetëse për zhvillimin e fëmijëve.

Mbështetja financiare e AADF për Shkollën e Drejtorëve lidhet me angazhimin afatgjatë të Fondacionit për forcimin e cilësisë së arsimit në Shqipëri. AADF beson se investimi në drejtues të përgatitur dhe profesionistë është një investim me ndikim të gjerë, pasi lidershipi i mirë në institucionet arsimore ndikon në cilësinë e mësimdhënies, në kulturën institucionale dhe në përmirësimin e shërbimeve që u ofrohen fëmijëve dhe komuniteteve.

Certifikimi i Brezit të Dytë të Programit të Trajnimit për Arsimin Parashkollor përfaqëson një tjetër hap drejt konsolidimit të Shkollës së Drejtorëve si një model i qëndrueshëm i kualifikimit profesional në sektorin e arsimit. Interesi në rritje për programin dhe rezultatet e arritura nga pjesëmarrësit konfirmojnë nevojën për të vijuar investimin në një kulturë të re drejtimi, ku zhvillimi profesional, reflektimi mbi praktikën dhe përmirësimi i vazhdueshëm janë pjesë thelbësore e rritjes së cilësisë në arsim.