CleanScore dhe AADF mundësojnë regjistrimin e universiteteve publike në librarinë digjitale JSTOR

AADF dhe CleanScore kanë arritur në një marrëveshje përfundimtare për të financuar regjistrimin në librarinë digjitale JSTOR të Universitetit të Tiranës, Universitetit Bujqësor të Tiranës, Universitetit “Aleksandër Moisiu” Durrës, dhe Universitetit “Fan S. Noli” Korçë.

JSTOR u themelua në vitin 1994 nga William G. Bowen. Libraria digjitale JSTOR u konceptua për të mbështetur bibliotekat dhe botuesit akademik në krijimin e formateve digjitale të botimeve të tyre, duke i ruajtur ato për gjeneratat pasardhëse. Nëpërmjet kësaj platforme digjitale gjithëpërfshirëse, stafi akademik së bashku me studentët do të kenë mundësinë të shqyrtojnë fusha të ndryshme studimore. Ky regjistrim u mundëson atyre akses në një sërë materialesh akademike duke përfshirë miliona artikuj, revista shkencore, si dhe libra të disiplinave të tilla si arti, filologjia, biznesi, teknologjia, zhvillimi i qëndrueshëm, trashëgimia kulturore, ekologjia dhe botanika. JSTOR shërben si një platformë praktike e cila e bën më të thjeshtë kërkimin shkencor, zhvillimin e planeve mësimore dhe pjesëmarrjen në konferenca dhe konkurse kombëtare si dhe ndërkombëtare.