Mozaik Kruje: Kruja tradicionale vjen pranë Pazarit të Ri të Tiranës

Qyteti i Krujës, i cili mbart një trashëgimi të pasur kulturore dhe një domethënie historike për të gjithë shqiptarët, ishte kryefjala e “Mozaik Krujë”. Dita e dedikuar qytetit të Krujës u organizua në Pazarin e Ri të Tiranës nën kujdesin e AADF dhe në bashkëpunim me Bashkinë Krujë, Bashkinë Tiranë, TID Kruja, shoqatës së biznesit TID Tirana, si dhe Agjencinë për Zhvillim Rajonal 2.

Ky aktivitet ishte i mbushur me shfaqje muzikore, valle tradicionale, përfshinte gjithashtu një panair të produkteve kulinare dhe artizanale për të cilin shquhet qyteti i Krujës. Bashkëpunimi midis shoqatave të përmirësimit të biznesit (TID) kishte si synim promovimin e turizmit, kulturës vendase si dhe rijetësimin e zonës së Pazarit të Vjetër të Krujës. Midis të ftuarve të nderuar ishin gjithashtu anëtarët e bordit drejtues të AADF-së, Z. Erjon Veliaj, Kryetari i Bashkisë Tiranë, Znj. Eglantina Gjermeni, Deputetja e zonës Krujë, si dhe anëtarë të përfaqësive diplomatike në Tiranë.

Mbrëmja u finalizua me “Natën e Modës së Artizanëve”, ku u vunë në pah krijimet artizanale të qytetit të Krujës të cilat punohen me metoda tradicionale. Këto të fundit u paraqitën përkrah krijimeve novatore të stilistes së talentuar Gerta Oparaku.