Amfiteatri i Durrësit

Rijetëzimi i një prej qyteteve më të rëndësishëm historik të Shqipërisë

Durrësi është një nga qytetet më të vjetra në Shqipëri, i cili ka një domethënie të madhe historike falë trashëgimisë së pasur e cila daton mbi 2600 vite. Plani i Menaxhimit të Integruar të zonave arkeologjike “A” dhe “B” të qytetit të Durrësit ka si synim të paraqes një strategji të qëndrueshme për restaurimin e kësaj trashëgimie duke kombinuar ruajtjen dhe mbrojtjen e këtyre zonave me nevojën e qenësishme për zhvillim ekonomik të qytetit.

AADF në bashkëpunim me Ministrinë e Kulturës dhe Bashkinë Durrës, kanë nisur projektin e dytë të këtij lloji, me synim rijetëzimin e qytetit të Durrësit pas dëmtimeve të shkaktuara nga tërmeti i cili e goditi qytetin në Nëntor të vitit 2019.

Zonat arkeologjike A dhe B përfshijnë monumente të tilla si Amfiteatri Romak, Forumi Bizantin, Termat Romake, si dhe një sërë strukturash të tjera të një rëndësie të veçantë historike.

Synimi afatgjatë i Planit të Menaxhimit të Integruar është mbrojtja e trashëgimisë historike të qytetit të Durrësit si një vendbanim i vazhdueshëm për më tepër se 3000 vjet. Kjo përfshin vënien në pah të këtyre vlerave duke i ofruar mundësi publikut për t’i vizituar ato nga afër.

Falë kësaj qasje do të ruhet një balancë e vazhdueshme ndërmjet trashëgimisë kulturore, turizmit dhe zhvillimit urban të qytetit.